Imbinglay ni La Union Governor Mario Eduardo C. Ortega nga agtultuloy a dumurdur-as iti ekonomiya ti probinsia babaen iti panangpapigsa iti agrikultura, turismo, ken babassit a negosio iti State of the Province Address (SOPA)-na idi Hulio 28, 2026 iti Speaker Pro Tempore Francisco I. Ortega Convention Center idiay Barangay Sevilla, City of San Fernando, La Union.
Segun ti gobernador, agtaltalinaed nga umdas iti produksion ti bagas ditoy probinsia bayat a dandani 20,000 inputs iti naipaayan dagiti abono, pesticides, ken dadduma pay nga agricultural inputs, malaksid pay iti ₱27 million a gatad ti farm mechanization assistance.
Nakapastrek met ti nasurok ₱12 million dagiti nadumaduma a trade fairs babaen iti tulong ti Department of Trade and Industry (DTI), bayat a dumanon ti nasurok ₱13 million iti birok ti La Union Pasalubong Center a nakatulong kadagiti 85 micro, small and medium enterprises (MSMEs).
Innayon pay ni Ortega a nasurok 500,000 a turista iti bimmisita ditoy La Union idi 2025 a nagresulta ti nasurok ₱1 billion tourism receipts, kagiddan ti panangipatungpal ti Ridge to Reef Program ken Hawaiian-Philippines Trade Mission tapno ad-adda a mapapigsa iti turismo ken panagpuonan ti probinsia.###
