BR LA UNION – Nagballaag ti Philippine Coast Guard (PCG) seknan iti posible a panagsuwek ti rocket debris ti China iti kabaybayan iti Northern Luzon.
Nakatuding nga iyuswat ti China iti Jielong-3 rocket manipud Haiyang, Shandong Province iti baetan ti alas-10:29 ti agsapa ken alas-11:04 ti agsapa (PH time) inton Miyerkules, Agosto 5.
Imbaga ti Coast Guard District North Eastern Luzon, a maibasar iti impormasyon manipud Philippine Space Agency, nadetermina ti drop zone iti uneg ti exclusive economic zone (EEZ) ti Pilipinas.
Posible a matinnag ti sumagmamano a paset ti rocket iti Drop Zone 1 a masarakan iti nasurok kumurang 94 nautical miles manipud idiay Babuyan Island ken 143 nautical miles manipud Sta. Ana, Cagayan.
Segun iti ahensiya, nupay nababa iti peligro na iti teritoryo ti Pilipinas, ngem maabiswan ti amin a lugan pangbaybay a liklikan ti aglayag kadagiti nadakamat a drop zone iti nasao nga aldaw ken dagus nga ipakaammo iti kaasetgan a PCG unit ti anyaman a mapagdudua-an a rocket debris.
