Dinayyeg ti magnitude 6.3 a tectonic earthquake iti kabaybayan nga adda iti nasurok-kumurang 99 kilometro iti abagatan a laud ti Balut Island, ili ti Sarangani, Davao Occidental, alas-5:41 ti bigat ita nga Huwebes, Agosto 6, segun ti Philippine Institute of Volcanology and Seismology (PHIVOLCS).
Impadamag ti ahensia nga iti panagdayyeg ket addaan ti kauneg a 10 kilometro ken maysa nga aftershock ti magnitude 7.8 Offshore Sarangani ken magnitude 6.5 Offshore Davao Occidental earthquakes idi Hunyo.
Maibasar iti instrumental intensity ti PHIVOLCS, nailista ti Intensity III idiay Sta. Maria, Davao Occidental, Malungon, Sarangani, ken Tupi, South Cotabato.
Narikna met dagiti nakapsut a panagdayyeg kadagiti sumagmamano a paset ti Davao del Sur, South Cotabato, Sultan Kudarat, Cotabato, ken Davao City.
Iti inisial a panagammiris ti PHIVOLCS, awan ti manamnama a perdision ken awan met ti manamnama a kasaruno nga aftershock mainaig ti nasao a ginggined.
Nupay kasta, agtultuloy a mabalbalakadan iti publiko a suruten dagiti opisial nga abiso ti PHIVOLCS ken dagiti lokal nga autoridad para iti aniaman a kanayunan nga update.###
