Nagpalagip ti Department of Health (DOH) Ilocos Region iti publiko a siguradoen a natalged ken nalinis iti in-inumenda a danum iti panawen ti didigra tapno maliklikan dagiti sakit nga ited ti kontaminado a danum.
Segun iti ahensia, napateg a napaburokan iti danum iti uneg ti dua a minuto sakbay nga inumen tapno mapatay dagiti mikrobyo ken dadduma pay nga organismo a mabalin a mangited ti sakit.
Palagip pay kadagiti umili nga agusar ti chlorine tablets a maitunos iti umno a bilin dagiti lokal a gobierno wenno health facility tapno masiguro a natalged iti danum para iti panagkunsumo.
Kasapulan met a siguradoen a nalinis ken nakalluban dagiti pagkabilan ti danum tapno maliklikan iti pannakakontamina daytoy ken mapagtalinaed iti kinadalus ti mainum a danum.
Kabayatanna, mensahe ti DOH Ilocos Region iti publiko a dagus a makikoordinar kadagiti otoridad iti oras ti emerhensia babaen ti National Emergency Hotline 911 wenno kadagiti lokal nga emergency hotline. // via Bombo Jordan Colcol
