Palawaen ti U.S. State Department iti panagsukimat kadagiti social media accounts dagiti foreign journalist a nagapply ti visa tapno makatrabaho idiay Estados Unidos.
Iti sidong ti napalawa a polisiya ti administrasion ni U.S. President Donald Trump, kasapulan nga aramiden a public dagiti aplikante dagiti social media accounts da tapno masukimat dagiti opisial ti America.
Sakop met ti kapada nga online screening dagiti sumagmamano nga aplikante para iti working visas dagiti mangmangged manipud idiay Canada ken Mexico.
Segun ti U.S. State Department, panggep ti “online presence vetting” a masigurado a kualipikado dagiti aplikante iti sidong ti linteg ti Estados Unidos ken saan da a pangta iti seguridad ti pagilian, kinatalged ti publiko, wenno ti nasional nga interes.
Innayon pay ti ahensia, paset daytoy dagiti addang tapno maammuan iti posible a panagkaor kadagiti aplikasion ti visa.
Saan pay nga imbaga ti U.S. State Department no katno ti eksakto a panangipatungpal iti napalawa a patakaran.
Maipalagip a nagirut met idi napalabas iti Department of Homeland Security kadagiti pagalagadan para iti panagtalinaed dagiti foreign journalist, international students, ken dadduma pay a visa holders idiay Estados Unidos.
Kabayatanna, nangipeksa ti panagdanag dagiti sumagmamano a civil liberties advocates gapu ta mabalin a makaapektar iti nair-irut nga screening iti kinawaya iti panagrakurak.###
