Manamnama nga agtultuloy a makaapektar ti Habagat kadagiti sumagmamano a paset ti Luzon ita nga aldaw ti Martes, Agosto 11, ngem in-inuten a kumapsot kadagiti sumaruno nga aldaw, segun ti Philippine Atmospheric, Geophysical and Astronomical Services Administration (PAGASA).
Agtultuloy a makapadas ti sagpaminsan a napipigsa a panagtudo idiay Zambales, Bataan ken Occidental Mindoro, a posible a dumanon iti 100 agingga 200 millimetro iti tudo ken addaan ti pangta ti panaglayos ken landslide.
Naulep a tangatang a nabuyogan ti mawaras-waras a panagtudo ken thunderstorms iti posible a paniempo idiay Metro Manila, CALABARZON, Pangasinan, Benguet, sumagmamano a paset ti Central Luzon, ken sumagmamano a paset ti MIMAROPA ken Bicol.
Idiay Palawan, mangigubuay latta ti panagtudo iti Habagat, bayat a localized thunderstorms iti posible a mapasaran idiay Visayas ken Mindanao.
Kabayatanna, agtultuloy a bambantayan ti PAGASA ti Tropical Storm Peilou nga adda iti ruar ti Philippine Area of Responsibility (PAR), a naudi a nasaripatpatan iti kadayo a 3,355 kilometro daya ti extreme Northern Luzon. Kabuyog daytoy iti maximum sustained winds nga 85 kilometro tunggal oras ken kapegges nga agingga 105 kilometro tunggal oras.
Kadagiti sumaruno ng aldaw, manamnama a kumapsot pay iti Habagat ken in-inut a sumayaat iti kasasaad ti panawen iti dakkel a paset ti pagilian.###
