Nangisayangkat iti City Health Office (CHO) ti “Oplan Ligtas Tubig” manipud idi Lunes, Agosto 10, 2026, tapno masiguro iti kinalinis ken kinatalged dagiti pagal-alan ti danum dagiti residente kalpasan iti nakaro a panaglayos ditoy Siudad.
Immuna a tinutukan ti CHO dagiti low-lying barangay iti coastal belt. Idi Lunes, nangisayangkat ti water disinfection kadagiti water source idiay Barangay Catbangen, Sevilla, ken Madayegdeg.
Intuloy met daytoy idi Martes, Agosto 11, idiay Barangay Biday ken Parian, no sadino, nangipaay iti CHO ti chlorine garnules kadagiti residente.
Segun kenni City Health Officer Dr. Michael C. Bangloy, agtultuloy iti disinfection kadagiti water source kadagiti sumarsaruno pay nga aldaw tapno maliklikan dagiti kaso ti panagtakki a mabalin nga ited ti kontaminado a danum kalpasan ti panaglayos.
Tallo a teams iti mangisaysayangkat ti operasion ken target a madanon iti mayoria ti coastal ken inland barangay iti Siudad. Manamnama a malpas iti programa inton Agosto 31.
Inlawlawag met ti CHO nga addaan dua a klase ti water source dagiti residente – deep well ken danum a dumaldalan manipud iti tubo. Para iti deep well, mismo ti reservoir iti idis-disinfect usar iti chlorine gapu ditoy a maur-urnong iti danum.
Kabayatanna, saan nga umno a direkta nga i-disinfect usar iti chlorine iti danum a dumaldalan kadagiti tubo. Isu ik-ikkan laengen ti CHO ti chlorine granules dagiti residente nga agus-usar daytoy tapno isuda mismo iti mangikabil kadagiti pagur-uronganda ti danum nga us-usarenda para iti inaldaw-aldaw a panagkonsumo.
Para met kadagiti residente nga awan ti access iti water refilling station ken saan pay a nadanon ti chlorination program, irekrekomenda ti CHO iti panagpaburok ti danum. Segun kadakuada, natalged met a wagas iti panagpaburok bayat nga ur-urayen iti panagsangpet ti chlorine iti barangayda.
Addaan met dagiti barangay nga immuna nga inikkan ti CHO ti Aqua Tabs. Mabalin a dumawat iti publiko iti daytoy kadagiti barangay health station, no sadino, ilawlawag met dagiti health worker iti umno a panagusar daytoy maibasar iti kinaado ti danum iti pagkabilan.
Al-allukuyen ni Bangloy dagiti residente nga awaten iti serbisio nga ipapaay ti CHO kas addang tapno maliklikan iti panagtakki ken mapagtalinaed iti nalinis ken natalged a danum nga ikonkonsumo ti tunggal Fernando ken Fernanda. (Report by Bombo Jordan Colcol)
