Maangay ti “Dugong Buhay: A Bloodletting Activity” ditoy Siudad ti San Fernando, La Union inton Agosto 20, 2026, kas paset ti agtultuloy a kampania tapno maparegta ti publiko nga agdonar iti dara ken tumulong kadagiti agkasapulan a pasiente.
Maangay ti bloodletting activity manipud 8:00 a.m. agingga 2:00 p.m. iti ABC Hall, iti likudan ti City Hall, Siudad ti San Fernando, La Union. Silulukat ti aktibidad kadagiti amin a kualipikado ken interesado nga agdonar iti dara a kayatda ti makipaset iti aktibidad a makatulong ken makaispal iti biag.
Dagiti kualipikasion ti donor ti dara ket ti kaadda a timbang iti saan a nababa ngem 50 a kilo, bayat a ti pulse rate ket iti 60 aginggana ti 100 beats iti tunggal maysa a minuto ken ti regular a ritmo, ti presion ti dara nga addaan iti systolic a 90–160 mmHg ken ti diastolic iti 60–100 mmHg, ken ti hemoglobin a lebel iti saan a nababa ngem 125 g/L.
Saan met a mapalubosan dagiti masikog nga agdonar iti dara. Para kadagidiay addaan iti baro a tattoo wenno ear piercing, masapul a lumabas ti naikeddeng a panawen sakbay a kualipikadoda kas donor, sigun iti panangeksamen ken pagalagadan dagiti medical personnel.
Amin nga agtarigagay nga agdonar ti dara ket umuna nga agpa-medical screening ken examination iti activity site tapno masigurado ti kinatalged ken kualipikasyon da kas blood donors. Maawat met dagiti walk-in donors, isu nga awan ti kasapulan a nasakbay nga appointment tapno makipaset.
Napateg ti regular a panagdonar iti dara agsipud ta kasapulan ti suplay ti dara iti nadumaduma a medikal a kasasaad, agraman dagiti emerhensia, operasion, panagpasngay, aksidente, ken panangagas kadagiti pasiente nga agkasapulan iti dara.
Maiparegta dagiti kualipikado nga umili ken dadduma pay nga interesado nga indibidual a makiraman iti aktibidad ken agbalin a paset ti panagtitinnulong tapno mataginayon ti umdas a suplay ti dara para kadagiti agkasapulan.
Babaen ka daitoy, matulongan ti maysa a donasion ti ad-adu a pasiente ken mangipaay iti napateg a namnama kadagiti pamilia a makapaspasar iti emerhensia wenno sakit.
Ngarud, maawis ti publiko a makiraman iti “Dugong Buhay: A Bloodletting Activity” ken agdonar iti dara a sangsangkamaysa para kadagiti dadduma—simple nga addang a mabalin a rason ti panangispal iti biag. (Report by Bombo Ericka Quinzon)
