Posible a ngumato ti ₱3.75 agingga ₱4.25 iti kada litro iti diesel ken ₱2.50 agingga iti ₱3.00 iti gasolina inton sumaruno a lawas, maibasar iti panaggaraw ti Mean of Platts Singapore (MOPS) ken foreign exchange rates manipud Agosto 10 agingga Agosto 13.
Segun iti oil industry source, kangrunaan a rason ti manamnama a panagngato ket iti panagngina ti sangalubongan a presio ti langis gapu ta kimmapsot iti namnama a maaddaan dagus ti peace deal ken iti panagsubli ti normal iti panagdalan idiay Strait of Hormuz.
Agtultuloy met a mangipapay ti pressure iti presio iti panagbaba ti global oil inventories, limitado a suplay manipud iti Middle East Gulf ken Black Sea, ken panagamak iti posible nga epekto ti sanctions iti suplay ti krudo.
Para met iti diesel, nakanayon iti pressure dagiti peggad iti suplay manipud Middle East ken limitado a Russian exports, bayat a supsuportaran ti regional demand iti presio ti gasolina.
Nupay kasta, mabalin a limitaran ti senyales iti panagkapsot ti global demand ken panagngato ti crude inventories idiay Estados Unidos iti kanayunan a panagngato ti presio.
Kadawyan nga ipadpadamag dagiti kompanya ti langis iti opisial a price adjustments tunggal Lunes, a maipatungpal iti kabigatanna.###
