Naipresenta iti maika-17 nga aldaw ti impeachment trial ni Bise President Sara Duterte iti kaunaan nga “hostile witness” a ni Gina Acosta, sigud a Special Disbursing Officer (SDO) ti Office of the Vice President (OVP).
Iti presentasion ni House Prosecutor Atty. Amando Virgil Ligutan, nadakamat nga agdama a Vice Presidential Staff Officer VI ni Acosta. Nagsirbi met isuna nga SDO ti OVP idi 2022 ken 2023 ken nagbalin nga SDO ti confidential funds ti Davao City idi 2019 agingga 2022, idi alkalde pay ditoy ni Duterte. Nagtrabaho met isuna iti Davao City government, karaman iti City Budget Office ken City Administrator’s Office.
Iti offer of testimony ti prosekusion, kenuna ni Ligutan a karaman kadagiti isyu a matalantan iti panagusar ti OVP ti ₱125 million a confidential funds iti uneg ti 11 nga aldaw idi Disyembre 2022, karaman iti pakabuklan a ₱500 million a na-withdraw iti uppat a nagsisina a transaksion manipud Disiembre 2022 agingga Hulyo 2023. Immunan a naipadamag nga uppat a tseka a tig-₱125 million iti inencash ni Acosta.
Impaganetget met ti prosekusion a maipagarup a binilin ni Duterte ni Acosta nga i-release iti cash iti security official ti OVP a ni Col. Raymund Dante Lachica. Mainaig ditoy, nadakamat iti Joint Circular 2015-01, a mangitudtuding dagiti alagaden iti panagusar ken panag-account ti confidential ken intelligence funds.
Segun kenni Ligutan, adda dagiti panagkurang iti liquidation ken supporting documents ti confidential fund disbursements ken itudo ni Acosta dagiti dokumento a nga adda pakainaiganna kadagiti alegasion a nakalanad iti Articles of Impeachment.
Kimmontra met ni Defense Counsel Atty. Lindon Bacquel iti panangtalantan iti nagbalin a trabaho ni Acosta kas SDO ni Davao City, gapu ta maipagarop a saan daytoy a karaman kadagiti akusasion iti impeachment complaint.
Tinakderan ni Ligutan, napateg iti nasao nga impormasion tapno ipakita iti posible a pattern iti wagas ti panangmanehar iti confidential funds.
Pinalubusan ni Escudero iti panagdamag maipapan iti kapadasan ni Acosta idiay Davao City tapno maammuan no adda ti “pattern of behavior,” ngem inlawlawag a saan a paset ti mismo a kaso dagiti pasamak sadiay.###
