Agtultuloy iti panangmonitor ti Department of Education (DepEd) Region 1 iti epekto ti agtultuloy a tudo gapu iti napapigsa nga Habagat, pakairamanan iti pannakadadael dagiti pagadalan ken ti kinatalged dagiti mangisursuro ken estudiante iti rehion.
Iti pannakiuman ti Bombo Radyo ken ni Cesar Bucsit, Public Information Officer ti DepEd Region 1, kinunana a 1,002 a minor damages, 438 major damages, ken 309 totally damaged classrooms iti nairekord.
Segun kenni Bucsit, agtultuloy iti assessment ti DepEd kadagiti pagadalan tapno maammuan ti pakabuklan a kalawa ti nadadael ken ti kasapulan a pondo para iti pannakatarimaan ken pannakaibangon manen dagiti naapektaran a pasilidad.
Kabayatanna, impaganetget ti DepEd iti panangtungpal iti DepEd Order No. 022, s. 2024, wenno Revised Guidelines on Class and Work Suspension in Schools During Disasters and Emergencies, nga addaan panggep a salakniban dagiti estudiante, mannursuro, ken non-teaching personnel kontra kadagiti peggad a patauden dagiti didigra.
Iti sidong ti nasao a pammilin, mabalin nga isuspende ti in-person class ken trabaho kadagiti pagadalan no adda ti didigra wenno emerhensia a mabalin a mamagpeggad iti kinatalged dagiti school personnel ken learners. Panggep daytoy a masigurado iti panagtultuloy ti panagadal iti laksid ti suspension.
No masuspende dagiti in-person classes, saan a rumbeng a maipan iti peggad dagiti estudiante tapno makastrek iti pisikal a klase. Kabayatanna, masapul a tungpalen dagiti mannursuro ken dadduma pay a personnel iti katupag a work-suspension wenno work-arrangement directive ti DepEd ken dagiti otoridad, depende iti kasasaad ken kasaknap ti didigra.
Impaganetget pay ti DepEd a dagiti estudiante a saan a nagatendar wenno saan a nakaaramid dagiti learning activities gapu iti class suspension gapu iti kalamidad ket rumbeng a maikkan iti umno a konsiderasion iti attendance ken completion dagiti learning tasks-da.
No maipapan iti panagtultuloy ti edukasion, mabalin nga usaren dagiti pagadalan ti Alternative Delivery Modes (ADM), kas iti modular ken online learning, no ipalubos ti sitwasion dagiti estudiante. Segun iti pagannurotan ti DepEd, nasken a maikonsiderar iti kinakaro ti didigra ken ti kabaelan dagiti agad-adal sakbay a maited dagiti home-learning activities.
Iti agdama, agtultuloy iti suspension ti klase kadagiti sumagmamano nga ili ken probinsia kas sungbat iti epekto ti dakes a panawen, bayat nga agtultuloy ti panangmonitor ti DepEd Region 1 iti kasasaad dagiti pagadalan tapno masigurado iti kinatalged ti sibubukel a sektor ti edukasion ken tapno agtultuloy iti panagadal kadagiti natalged a lugar para iti daytoy.###
