Nangipataw iti Estados Unidos ti sanctions idi Agosto 18, 2026 kontra kenni International Criminal Court (ICC) President Tomoko Akane ti Japan ken Senior Trial Lawyer Abdoulaye Seye ti Senegal, kas paset iti agtultuloy nga addang ti Trump administration maibusor iti korte.
Segun kenni U.S. Secretary of State Marco Rubio, direkta a nakipaset da Akane ken Seye kadagiti panagregget nga agimbestigar, mangaresto, mangdetain wenno mangusig dagiti opisial dagiti pagilian a saan a mangbigbigbig iti hurisdiksion ti korte. Dagiti sanctions ket naipataw babaen ti Executive Order 14203, a pinermaan ni President Donald Trump idi 2025.
Karaman kadagiti epekto ti sanction iti panang-freeze iti aniaman a sanikua dagiti dua nga adda iti hurisdiksion ti Estados Unidos ken panangiparit iti panag-akses da iti financial system ti Amerika.
Ni Seye ket paset kadagiti kandidato para iti 2026 ICC judicial elections, ken innem a baro a judges iti mabotosan inton Disiembre. Maysa met isuna kadagiti opisial ti ICC a karaman kadagiti panagusig nga adda pakainaiganna iti sitwasion idiay Palestine.
Kinondena met ti ICC iti addang ti Washington ken kenuna nga iti panangipangta kadagiti opisial daytoy gapu iti trabahoda iti panangipatungpal ti linteg ket mangikabkabil iti peggad iti international legal order ken rule of law.
Ti baro a sanction ket paset ti nalawlawa a kampanya ti Trump administration kontra iti ICC, karaman dagiti immuna nga addang kotra kadagiti prosecutors ken judges gapu iti imbestigasion ti korte kontra kadagiti alegasion ti krimen dagiti American personnel ken iti warrant kontra ken ni Israeli Prime Minister Benjamin Netanyahu ken sigud a Defense Minister Yoav Gallant.###
