Ngimmato iti kadawyan a presio ti tingi a bagas iti intero a pagilian iti umuna a paset ti Agosto.
Segun iti kauddian a report ti Philippine Statistics Authority (PSA) maipapan iti presio dagiti agricultural products, dumanon iti ₱49.61 tunggal kilo iti kadawyan a presio ti regular-milled rice manipud Agosto 1 agingga 5. Nangatngato daytoy ti 22.16% maiyarig iti ₱40.61 tunggal kilo iti kapada a panawen idi 2025.
Iti panagngato ti presio ti bagas ket kagiddan ti panagsagana ti Department of Agriculture (DA) iti posible a nababbaba nga apit ti irik iti maikatlo a quarter ti tawen, a manamnama nga apektaran ti El Niño.
Immunan a ninamnama ti PSA a mabalin a bumaba ti 13.3% iti produksion ti irik iti maikatlo a quarter, wenno 3.25 million metric tons manipud Hulio agingga Setyembre.
Kabayatanna, ngimmato ti 5.7% iti produksion ti irik iti maikadua a quarter, a dumanon ti 4.63 million metric tons.###
