Agtultuloy iti panangmonitor ti Municipal Disaster Risk Reduction and Management Office (MDRRMO) ti San Juan, La Union kadagiti agarup 23 a riverside barangay gapu iti manamnama a panagtudo a gapuanan ti napapigsa nga Habagat.
Segun kenni Gino Osvi Mabalot, mangidadaulo ti MDRRMO San Juan, agtaltalinaed a silulukat ti Emergency Operations Center-da iti 24/7 para iti agtultuloy a panagmonitor ken dagus a panagresponde kadagiti posible nga insidente.
Maibasar iti kaudian a report ti state weather bureau ita nga aldaw, Agosto 24, 2026, apektado ti Southwest Monsoon wenno Habagat iti Northern ken Central Luzon, agraman ti La Union. Nangipaulog pay iti ahensia ti Yellow Heavy Rainfall Warning para kadagiti sumagmamano a lugar iti Ilocos Region, nga addaan iti pangta ti layus ken panagreggaay ti daga kadagiti lalayusen ken landslide-prone areas.
Kabayatanna, kenuna ni Mabalot a nakapadas ti panagapaw ti danum iti Sta. Rosa Bridge ken ti San Juan-San Gabriel Road kadigiti napalabas a lawas. Gapu iti daytoy, maiparit iti panagdalan dagiti nadagsen a lugan kadagiti apektado a paset daytoy.
Inlawlawag ni Mabalot, maysa kadagiti kangrunaan a rason iti panaglayos ken panagngato ti danom iti karayan kadagiti nadakamat a lugar ket iti napartak a panagayus ti danum ti tudo manipud iti kabambantayan nga agturong kadagiti nababa a lugar.
Agtultuloy ti panangbalakad ti MDRRMO iti publiko, nangruna dagiti mangngalap, nga agtalinaed nga alerto, dumngeg kadagiti opisial a pakaammo ken nainget a suroten dagiti safety measures a maipatungpal, partikular no napigsa ti tudo ken adda ti mabambantayan a bagyo.###
