PInasingkedan ti Philippine National Police (PNP) a nalpasen iti imbestigasyon iti insidente ti pammaltog iti uneg ti maysa a pribado a pagadalan idiay ciudad ti Zamboanga a nakatayan ti maysa a Grade 10 student ken ti Grade 8 student a maitudtudo a shooter.
Segun kenni PNP PIO Chief Police Col. Allen Rae Co, maipasidong pay nga umuna iti panaganalisar ti kinakompleto dagiti detalye sakbay a maisubmitir ti resulta kenni PNP Chief General Jose Melencio Nartatez Jr.
Apaman nga aprobaran ti PNP Chief iti imbestigasion, mairuar iti resulta kadagiti maseknan nga institusion, pakairamanan ti Ateneo de Zamboanga University.
Kinuna ti PNP a napateg a siguraduen a kompleto ken umiso dagiti amin nga impormasion a linaon ti imbestigasion sakbay nga opisial a mairuar daytoy.
Maur-uray pay laeng iti resulta ti panaganalisar ti PNP Chief sakbay a maipakaammo iti pagadalan ken dadduma pay a maseknan nga institusion ti dagup a natakuatan ti insidente.###
