Innalukoy ni US President Donald Trump ni Ukrainian President Volodymyr Zelensky a talnaanen ti panagraut kadagiti oil infrastructure ti Russia gapo iti epekto na ti sangalubongan a suplay ken panagngato iti presyo ti lana.
Kagiddan daitoy dagiti nagsasaruno a long-range drone attacks ti Ukraine kadagiti oil refineries ti Russia idi napalabas a bulan, a nakaro a nangkissay ti produksyon ti langis ken nangigubuay pay iti kinakurang na iti uneg ti pagilian.
Kinuna ni Trump nga adu pay dagiti mabalin a ma-target iti militar ti Ukraine a saan a dagiti oil refineries.
Impaganetget met iti Ukraine a lehitimo a military targets dagiti Russian refineries agsipud ta maus-usar dagitoy tapno mapondoan ken suportaran ti war effort iti Moscow.
Kabayatanna, agsobsobran iti innem a dolyar iti tunggal galon ti promedio a presyo ti diesel idiay Estados Unidos.
Imbasura pay iti Russia ti oil production forecast da ita a tawen iti kababaan a tukad iti las-ud ti 17 a tawen gapo iti epekto ti gyera.
