Mamati ti Philippine National Police-Criminal Investigation and Detection Group (PNP-CIDG) iti posibilidad ti nalawlawa nga operasion ti illegal a “paihi” wenno fuel pilferage kalpasan ti pannakatiliw ti tallo a lallaki idiay Navotas City.
Segun kenni CIDG-National Capital Region chief Police Colonel John Guiagui, agtultuloy iti imbestigasion dagiti otoridad no adda pay ti dadduma a karaman iti operasyon ken no adda dagiti mangipapaay ti proteksion kadakuada.
Natiliw dagiti tallo a suspek iti operasion idiay Barangay NBBS Kaunlaran idi Setiembre 12, a nakakumpiskaran ti nasurok 20,000 a litro ti diesel, storage tanks, container, maysa a 20,000-liter fuel tanker, 40,000-liter fuel tanker ken dadduma pay nga alikamen a mapattapatta nga aggatad ti ₱6.66 million.
Segun ti CIDG, mapapati nga iyak-akar dagiti suspek dagiti petroleum products manipud kadagiti dadakkel a tanker agturong kadagiti babbabassit a container para iti illegal a panaglako wenno distribusion nga awan ti kasapulan a permit manipud iti Department of Energy.###
