BR LA UNION – Rinugyanen ti Sangguniang Panlalawigan ti La Union a denggen iti singasing nga Annual Budget para iti Fiscal Year 2027.
Naisayangkat ti maikadua nga aldaw ti budget hearing idiay Speaker Pro Tempore Francisco I. Ortega Bayview Hall, Legislative Building ditoy siyudad ti San Fernando, nga indauluan ti Committee on Finance, Budget and Appropriations.
Karaman kadagiti naiparang ket ti ₱272.88 milion a singasing a pondo para iti Provincial Health Office para iti operasyon, panagsanay kadagiti health workers ken panangpasayaat iti medical equipment.
Iti Provincial Social Welfare and Development Office ket mailatangan ti ₱130.41 million para kadagiti programa para kadagiti ubbing, senior citizens ken dagiti addaan iti depekto wenno PWD.
Kabayatanna, ti singasing a budget iti Provincial Government Environment and Natural Resources Office ket ₱122.24 milion, para iti pannakapadur-as dagiti sanitary landfills idiay San Gabriel, Aringay ken Naguilian.
Natratar pay dagiti programa para kadagiti agtutubo, edukasyon, isports, panggedan, turismo, agrikultura ken dadduma pay a serbisio publiko.
Impaganetget dagiti kameng ti provincial board a nasken a siguraduen a tunggal mailatang a pondo ket addaan ti nalawag a programa ken direkta a makasungbat iti kasapulan dagiti umili.
