Inyuswat ti Komisyon sa Wikang Filipino iti Mapa ken Atlas dagiti nadumaduma a lengguahe ditoy Pilipinas iti National Museum of Natural History idiay Manila, tapno maiyeg ti ad-adu pay nga impormasion iti publiko maipapan kadagiti lengguahe ken kultura nga us-usaren ken italimeng dagiti nadumaduma a komunidad iti pagilian.
Naglaon ti atlas iti datos maipapan iti agarup 135 a katutubo a lengguahe iti Pilipinas, pakairamanan ti lokasionda, bilang dagiti agus-usar, kasasaad, ken sistema ti panagsurat.
Segun kenni Filipino Language Commission chairman Atty. Marites Barrios-Taran, napateg ti proyekto saan laeng nga iti panagrekord kadagitoy nu di ket iti panangipakita nga agtultuloy a maus-usar ken maipreserba dagitoy laksid dagiti karit ti moderno a teknolohia ken impluensia dagiti ganggannaet a lengguahe.
Babaen ti atlas, mabalin a maikeddeng dagiti lugar a pakausaran ti maysa a lengguahe ken makasarak iti impormasion a makatulong iti panagsirarak ken pannakapataud dagiti programa ti pagsasao.
Agtultuloy met ti Komision a mangurnong ken mangpasingked kadagiti datos manipud kadagiti komunidad tapno mapabaro ti impormasion maipapan kadagiti lengguahe a maus-usar iti pagilian.
