LA UNION – Addan ti go signal ti Provincial Government of La Union (PGLU) a mabalinen ti agpa-rehistro dagiti inbiduwal a karaman iti A-1 to A-4 priority group a mabakunaan kontra COVID 19.
Dagiti nasao nga inbiduwal iti naduma-duma a sektor ti kagimongan ket kasapolan a mairaman iti master lists dagiti mabakunaan babaen iti panagpa-rehistro iti link online a vaccines.launion.gov.ph
Maiyannurot iti resolusyon nga inaprubaran ti Inter-Agency Task Force (IATF) for the Management of Emerging Infectious Diseases idi April 15, 2021, dagiti indibiduwal a karaman iti A-4 priority group ket dagiti transportation workers, market vendors, religious leaders, overseas Filipino workers, agraman dagiti media practitioners, ken dadduma pay a mangmangged a maibilang a frontliners ken nangato ti exposure da iti publiko.
Iti A-4 priority group ket karaman dan iti vaccination program priority ti gobyerno, kas inaprubaran ti COVID-19 task force, tapno masiguro iti seguridad dagiti workers ken consumers.
Base iti kauddian a datus ti PGLU, umaboten iti 7,467 nga A-1 priority group dagiti nabakunaan iti first dose ti COVID Vaccine bayat a 2,064 dagiti fully vaccinated wenno kumpleton ti doses a naibakuna kadagitoy.
Maipalagip nga iti sidong ti prioritization framework ti IATF nga umun-una a mabakunaan ket dagiti medical frontliners ken healthcare workers para iti (A1), dagiti senior citizens para iti (A2) ken persons with comorbidities para iti (A3).
Ita a bulan ti Abril, impanamnama ti gobyerno a sumangpet iti pakabuklan a 1.5 million doses ti bakuna a pinartuat ti Sinovac BioTech ti China ken 500,000 doses ti Spuntik V a partuat ti Gamaleya Institute ti Russia.
Immunan a simmangpet ditoy pagilian iti pakabuklan a 3,025,600 vaccine doses as of April 11, a pakaibilangan iti 2.5 million doses ti Sinovac vaccine ken 535,600 doses ti AstraZeneca vaccine.
Dagiti saan pay a nabakunaan iti A-1 to A-4 priority group ket manamnama a mabakunaan iti katengngaan ti bulan ti Mayo agingga Hunyo apaman a sumangpet dagiti bulto ti bakuna, ditoy pagilian.
