Nainget a kinondenar ni Cabinet Secretary Benhur Abalos Jr. dagiti AI-generated videos ken editorial cartoons nga impablaak ti China Daily, a mangiladladawan kadagiti Pilipino iti racist, derogatory, ken dehumanizing a wagas.
Segun kenni Abalos, makikaykaysa isuna iti Department of Foreign Affairs (DFA) iti panangkondenar kadagiti kastoy a publikasion a nalawag a mangtagtagibassit iti dignidad ken katatao dagiti Pilipino.
Inpaganetget na nga awan ti lugar iti rasismo ken aniaman a kita ti panangisagmak iti responsable ken sibilisado a komunidad.
Inpalgak pay ni Abalos a mangrugi ti pudno a panagraem iti nagbaetan dagiti pagilian iti panangbigbig iti dignidad ken karbengan ti tunggal umili.
Kinunana nga agtultuloy iti pannakitinnulong ti gobierno iti DFA iti panangidepensa iti dayaw, karbengan, ken kinasiasino dagiti umili a Pilipino.###
