Agtalek ni Manila 6th district Representative Bienvenido Abante Jr. a makaalada ti “more than enough” wenno nasursurok pay iti one-third a boto manipud kadagiti kameng ti House of Representatives of the Philippines tapno ma-impeach ni Bise Presidente Sara Duterte. Daytoy ket no pagbasaran ti resulta ti botos idi umuna paylaeng nga impeachment ti Bise Presidente.
Ti maysa a press conference ita nga aldaw ti Sabado, Pebrero 21, impalawag ni Abante a manipud iti 311 a kongresista, 105 laeng a pabor a boto (katumbas ti one-third) ti masapul tapno maipasa ti impeachment complaint iti Senado.
Binigbig met ni Abante ti panagtungpal ti Kamara iti ruling ti Supreme Court of the Philippines maipanggep iti panangasikaso kadagiti impeachment complaints kontra ken Sara Duterte. Segun iti House Committee on Justice, adda pay 10 session days tapno maipastrek iti Order of Business kalpasan a ma-endorso wenno maipatulod iti opisina ni Speaker Bojie Dy dagiti reklamo.
Segun ken Abante, mabalin a agbayag ti dua agingga tallo nga aldaw ti deliberasyon sakbay a maipan iti plenaryo, a kasapulan ti one-third a boto ti Kamara tapno ma-impeach ti maikadua a kangatuan nga opisyal ti pagilian.
Ni Abante ket maysa kadagiti nag-endorso iti maika-uppat nga impeachment complaint, a kinumpirma ni Cheloy Garafil idi Pebrero 19 a naawat ti opisina ti Speaker.
