BR LA UNION – Nangipeksa ti panagdanag ni sigud nga health secretary nga itan ket House deputy majority leader ken Iloilo Representative Janette Garin seknan iti panangi-pasardeng ti Amerika iti ipapaay na a tulong iti World Health Organization (WHO).
Kinuna ni Garin a ti panag-withdraw ti Estados Unidos manipud iti World Health Organization ket mabalin a makaapekto iti kinatalged ti salun-at ti pagilian ken dadduma pay a programa a sup-suportaran ti WHO ken iti USAID.
Impaganetget ni Garin iti kinapateg na iti Pilipinas agsipudta adu a programa iti salun-at ket agsad-sadag iti funding support manipud WHO.
Malaksid dayta, impeksa pay ti mammanday linteg iti panagdanag na iti posible nga implikasyon ti nasao nga addang, a mabalin nga agserbi daytoy dalan para iti pagilian a China ken Russia a mangidaulo iti health organization, ken maipaayan da ti access kadagiti sensitibo nga impormasyon a mabalin a mangigubway ti pangta iti seguridad ti dadduma a pagilian.
