LA UNION – Naibutaktak dagiti adu nga anomalya iti barangay kalpasan ti turnover ceremony dagiti elected officials idi Lunes idiay Barangay Paringao, Bauang, La Union.
Iti esklusibo a pannaki-uman ti Bombo Radyo La Union kenni newly elected Barangay Chairman JP Ping-ay, imbinsa-binsa na dagiti sumagmamano nga anomalya a naduktalan na idi maisayangkat ti turnover iti konseho.
Maysa ditoy iti saan a nabayadan nga electric bill iti basketball court iti Sitio Rumas, sipud idi tawen 2012 nga agingga ita, makagapo iti nabayagen a kaawan ti kuryente iti nasao a paset ti barangay.
Malaksid dayta, nadiskubre pay ni Ping-ay a ti us-usaren ti barangay a service vehicle ket saan a naipa-rehistro sipud naiyisyu idi 2009.
Mapukpukaw met kunana iti sumagmamano a napapateg nga alikamen ti barangay a kas iti laptop ken tablet.
Maipagarop nga adda pay naka-budget ita a tawen 2018 nga empleyado ti barangay ngem addan iti ballasiw taaw.
Dagitoy ti makagapo nu apay a saan na a pinirmaan dagiti dokumento nga imprisintar ti DILG iti naisayangkat a turnover iti baetan ti outgoing ken incoming a konseho ti barangay.
Balakad met kenkuana ti Commission on Audit (CoA) a kasapolan a maiklaro amin nga isyu iti barangay, sakbay na a pirmaan dagiti nasao a dokumento.
Iti likudan dagiti nasao a nadiskubre a parikot iti barangay, impanamnama ni Kapitan Ping-ay kadagiti kabaranggayan na, nga amin a parikot iti masakopan na ket maasikaso ken matratar, kas paset iti sinapataan na a pagrebbengan.
Ni Ping-ay iti baro itan a Barangay Kapitan ti Barangay Paringao, kalpasan nga inabak na iti napalabas a Barangay Elections ni Jessie Mohammed.
