Imbilin ni Armed Forces of the Philippnes (AFP) Chief of Staff General Romeo Brawner Junior a lapdan ti puersa dagiti Chinese Coast Guard a makaasideg iti BRP Sierra Madre.
Daitoy ket kasaruno ti presensya dagiti nasao a barko ti People’s Republic of China iti paset ti Ayungin Shoal a paset paylaeng ti territorial waters ti pagilian.
Kadagiti sumagmamano nga inbinglay a videos ti Philippine Army ket makita a nilapdan dagiti dua a rubber boats ti pagilian ti gandat a panag-asideg ti bassit a barko ti China agturong ti direskyon ti BRP Sierra Madre.
Inyarig ni Brawner ti panagbaddek dagiti kameng ti CCG idiay BRP Sierra Madre kas panagbaddek metten iti teritoryo ti Pilipinas kasaruno ti panangipaganetget na ti Rules of Engagement (ROE) nga otomatiko a maipatungpal apaman mapasamak iti insidente.
Gapo daitoy kadagiti weaponry systems a nakaikabil ti barko ti China kasta met kadagiti rubber boats da a nalatak a panangkarit iti tensyon.
Kabayatanna, nangibati met ti mensahe ni Department of National Defense (DND) Secretary Gilberto Teodoro Junior iti biang ti China nga agtultuloy a mangiwarwaras ti propaganda ken awan kaskaskenan na nga impormasyon kadagiti social media platforms mainaig iti West Philippine Sea:
Kinunana nga awanen iti mamatmati pay kadakuada ken kanayon metlaeng nga adda iti rason ti China seknan dagiti masaysayangkat a multi-lateral activities nga uray pay daitoy ket awan met pakainaigan na kadagiti ar-aramiden da a panangharass.
