Nagtignay ti Armed Forces of the Philippines (AFP) a maus-usar a nasayaat iti Enhanced Defense Cooperation Agreement (EDCA) sites para kadagiti relief operations ita a panawen ti didigra.
Inlawlawag ni AFP Spokesperson Colonel Francel Margareth Padilla a maysa daitoy a multi-purpose facilities nga adda ti uneg mismo dagiti military bases.
Daitoy ket paset ti visiting forces agreement ken us-usaren latta ti US Forces a pagkabilan dagiti alikamen da tunggal adda iti balikatan exercises ken agbalbalin a multi-role nu kasapulan nga agbalin nga evacuation shelters, command and controls hubs, site for repacking kadagiti relief goods, hospital, ken dadduma pay.
Pangiyarigan kunana ket idi dimmuprak ti napigsa a bagyo ditoy pagilian ken nausar dagiti EDCA sites kas command and control hub a mangipakpakita nga iti kooperasyon ken koordinasyon ti Pilipinas kadagiti dadduma pay a nasyon ket aktibo kadagiti kapada a panawen.
Kabayatanna, laksid iti panangilawlawag iti AFP ket binabalaw latta daitoy ni Bise Presidente Sara Duterte.
Kinuwestyon na nu pudno a maus-usar dagiti EDCA sites kas paset ti disaster response wenno pabuya laeng a tapno maipaganetget nga addaan iti kastoy a pasilidad iti pagilian.
Innayon ti opisyal a saan da a trabaho a patulan iti kritiko ita a panawen iti didigra ken kinuna a ti ar-aramiden da ket puro “reported’ kadagiti umiso nga otoridad.
Maymaysa kunana iti panggep da kadagiti kakastoy a kasaad ti pagilian ken daitoy ket maipadanon ti tulong kadagiti apketado a residente kasta met a kunada nga awanen iti sabali pay nga intensyon da malaksid iti tumulong iti publiko.
Mainaig iti daitoy ket impanawagan ni Padilla iti publiko a saan nga iraman iti AFP kadagiti isyu politikal ken innayon nga aramiden da latta iti mandato ti hanay nga uray awan iti pakainaigan na iti politika.
Iti agdama ket agtultuloy ti koordinasyon ti AFP kadagiti maseknan nga ahensya ti gobierno para kadagiti relief operations ken uray dagiti rescue operations.
Kabayatanna, iti KC-135 aircraft met ti Estados Unidos ket naipadamag a nakasaganan tapno mangipatulod kadagiti Disaster Response Equipment idiay Clark Airbase, Pampanga.
