Nagyaman iti Armed Forces of the Philippines (AFP) ken Philippine National Police (PNP) kenni Presidente Ferdinand Marcos Junior iti kanayunan a pondo iti sidong ti 2026 General Appropriations Act (GAA).
Impasigudo ni AFP Deputy Chief of Staff Lt. Gen. Rommel Roldan nga agtultuloy iti serbisio ken sakripisio dagiti suldado para iti kinakappia ken seguridad ti pagilian, kas panangbigbig iti panagtalek nga impaay ti gobierno ken dagiti umili a Pilipino.
Maysa a panangbigbig ti nangatngato a budget kangrunaan para iti basic pay ken subsistence allowance iti sakripisio dagiti suldado ken ti pamilyada nga agserbi met kas inspirasion tapno ad-adda pay a pasayaaten iti pagrebbenganda.
Kabayatanna, kenuna ni PNP Acting Chief Lt. Gen. Jose Melencio Nartatez Jr. a ngimmato ti 10% iti budget ti PNP wenno ₱226 billion manipud iti sigud a ₱205 billion idi napalabas a tawen.
Impaganetget ni Nartatez a maaramit iti pondo tapno mapapigsa dagiti programa para iti kinatalged ti publiko ket panangpasayaat iti serbisio ti pulisia.
Impasigurado met ti opisial nga agtalinaed a nakapamaysa ti pulisia iti reporma.###
