BR LA UNION – Impasigurado ti liderato ti Armed Forces of the Philippines nga agtultuloy ti panagbantayda idiay West Philippine Sea tapno maipaganetget ti soberanya ti pagilian.
Segun iti Armed Forces of the Philippines, kabinnulig da iti nasao nga addang dagiti dadduma pay a maseknan nga ahensiya ti gobierno.
Iti maysa a statement, kinuna ni AFP Spokesperson, Colonel Francel Margareth Padilla, bayat ti panagpatrolyada iti nadakamat a kabaybayan, nasurok a 11,000 a barko ti napaliiwda idi napan a bulan.
Manipud iti nasao a bilang, 2,000 kadagitoy ket domestic vessels idinto a nasurok 9,200 dagiti foreign vessels.
Malaksid dayta, nasaripatpatan pay ti siyam a barko ti People’s Liberation Army Navy ken tallo a barko ti China Coast Guard idiay Bajo de Masinloc.
Nakita pay ti pito a barko ti PLA Navy ken CCG vessels idiay Ayungin Shoal.
Impadamag met ti AFP nga awan ti Chinese vessels a namonitor a nagtalinaed idiay Sabina Shoal wenno Escoda Shoal ti nasao a rehiyon.
