LA UNION – Agtaltalinaed iti pagbaludan iti ag-ama a maipagarop a nagprobokar ti riri ken nakumpiskaran da pay iti maipagarop a droga idiay Barangay Bawanta, Bauang, La Union idi kanikadwa a rabii.
Nabigbig dagiti ag-ama nga isuda Brasil Bucasan, 38, ken Mark John Bucasan, 19, agpada a construction worker ken residente ti Barangay Lower San Agustin, Bauang, La Union.
Dagus met a nirespondian iti Bauang Police iti naawat da a report maipapan iti panag-probokar iti ag-ama, partikular iti kalsada nga agturong iti Barangay Cabisilan ti nasao met laeng nga ili.
Maipagarop a naaktuan dagiti pulis nga aglala-aw iti ama bayat a naka-iggem ti bato idinto a ti anak ket kumarkarit.
Maibasar pay iti nakalap a report ti Bombo Radyo La Union, nakumpiskaran pay dagiti dua iti sagdu-dua a plastic sachet iti maatap a marijuana idi a kinapkapan dagiti otoridad.
Napasamak ti insidente kalpasan iti panag-suweldo dagiti suspek manipud iti nag-trabahuan dagitoy.
Iti agdama, sumangsango iti kaso a panaglabsing ti section 5 iti sidong ti Article 2 iti R.A. 9165 ken alarm and scandal dagiti ag-ama a suspek.
