Pinasingkedan ti Philippine National Police Forensics Group (PNP-FG) a 1,400 manipud iti pakabuklan a 2,000 a tulang ken artifact a narekobre iti Taal Lake ket naggapu iti tao.
Segun kenni PNP-FG Director Col. Pierre Paul Carpio, a sipud idi Hulio 10, 2025 ket agtultuloy ti napalawa a search and recovery operations.
Addaanda ti walo a team a mangisaysayangkat ti rotational duty kadua ti Philippine Coast Guard a naituding iti uppat a paset ti danaw.
Innayon ti opisyal a dagiti narekobre a rurog ket naipasidong iti nainget a serye dagiti panaganalisar karaman ti medico-legal analysis, forensic, anthropology, radiographic imaging, dental examinations ken DNA testing.
Masapul pay dagiti kompleto a forensic examination ti amin a narekobre nga ebidensia.
Inadmitir met ni Carpio a marigatan dagiti eksperto a mailasin dagiti akinkukua kadagiti tulang gapu iti kondision dagitoy kalpasan ti napaut a pannakaibabad-da iti Taal Lake.
Maysa kadagiti karigatan a pamay-an ket iti extraction manipud iti tulang para iti panangipasidong ti DNA testing.###
