Laksid ti agdama a tension iti pulitika, kenuna ni House Deputy Speaker Francisco Paolo Padua Ortega V nga agtultuloy a mangipapaay ti suporta dagiti agkabsat a mammanday-linteg nga isuda Senador Alan Peter Cayetano ken Senadora Pia Cayetano kadagiti proyekto iti Umuna a Distrito ti La Union.
Segun kenni Ortega, karaman kadagiti naitulong dagiti agkabsat iti panangipasdek ken panangsuporta kadagiti sports facility idiay ili ti Bacnotan karaman iti plano a panangpalawa pay kadagiti archery courts, ken ditoy Siyudad ti San Fernando.
Impaganetget na nga agtaltalinaed nga agkakadua dagiti nabotosan nga opisial iti panangidanon ti serbisio-publiko iti laksid ti nagduduma a trabaho ken mandato iti gobierno.
Kenuna, iti kangrunaan a tarigagay dagiti mammanday-linteg ket iti panangidanon dagiti programa a pagnumaran dagiti masakupan da.
Aminado met ti House Deputy Speaker a saan a maliklikan dagiti saan a pagkikinnaawatan ken susik iti tay-ak ti pulitika, ngem impaganetget na a normal laeng dagitoy ken saan a rumbeng nga agbalin a tubeng iti panagtultuloy dagiti proyekto para iti panagdur-as ken serbisio publiko.###
