LA UNION – Nainget a pinaglibakan ti chief-of-police idiay Sudipen, La Union iti alegasyon ti sumagmamano a UP students a nakabase idiay Manila, a maipagarop a sinip-siputan ida dagiti otoridad.
Daytoy ket kabayatan iti maipagarop a panangisayangkat dagiti nasao nga agad-adal iti community research iti nasao nga ili.
Impaganetget ni PSI Dominador Apostol II, agdama a hepe ti pulisiya, awan ti kinapudno na iti alegasyon a nangisayangkat da ti surveillance kadagiti nasao nga UP students.
Kinuna na a siasinuman a bisita wenno residente nga awan ti ar-aramiden na a maikaniwas iti linteg wenno mapagdudua-an ket awan ti rason tapno mapaliiw wenno masiputan.
Innayon na pay nga iti presensiya dagiti otoridad ket kasapolan pay ketdi nga apreciaren gaputa kaipapan laeng daytoy a mangted ti seguridad iti aglawlaw, partikular iti masakopan da a lugar.
Immuna ti daytoy, dinipensaan ti grupo nga Anakbayan La Union Chapter iti reklamo a harassment dagiti nasao nga estudyante maikontra kadagiti pulis idiay Sudipen, La Union.
