Inyusuat ti Overseas Workers Welfare Administration (OWWA) Region 1 ti Alagang OWWA Migrants’ Brew: Kapihan sa Kabuhayan Center ita nga aldaw Setyembre 3, 2026, nga agserbi a baro nga espasio para kadagiti Overseas Filipino Workers (OFWs) ken dagiti pamiliada.
Panggep ti Migrants’ Brew nga agserbi a lugar a sadiay dagiti OFW—nangruna dagiti agsubli iti pagilian—ket mabalin a paginanaanag, mangibinglay kadagiti kapadasan, ken makagun-od iti impormasion.
Segun kenni Marivic L. Mondina Regional Director ti OWWA R1, daytoy a gannuat ket paset ti pannakaipatungpal ti Alagang OWWA Program, maibatay iti Omnibus Guidelines on the Implementation of the Alagang OWWA Program ken Memorandum of Instruction No. 009-26, Series of 2026.
Ipangpangruna ti programa iti panangipaay ti responsive, needs-based, ken client-centered services para kadagiti OFW ken pamiliada.
Segun iti OWWA, agserserbi ti Alagang OWWA kas complementary wenno gap-filling mechanism kadagiti agdama a regular a programa, a nadisenio a mangpaadu iti suporta ken gundaway kas sungbat iti agbaliwbaliw a kasapulan dagiti OFW.
Dagiti paset ti programa ti Alagang OWWA ket mairaman ti YAKAP ken Gamot Centers, Global Emergency and Crisis Response Program, OFW Global Centers, Airport Terminal Lounges, Seafarers Welfare Centers, Serbisyo Caravan, ken STEP UP Program.
Kabayatanna, agserbi ti Migrants’ Brew: Kapihan sa Kabuhayan Center a kas rehional a “front door” para kadagiti agsubsubli nga OFW kadagiti pamiliada, a mangipaay kadakuada iti pannakagun-od iti impormasion, serbisio, ken gundaway.
Itampok pay ti sentro ti 3K (Kapihan, Kalinga, ken Kaalaman)—kas giya iti panangipaay kadagiti addaan kaipapanan a serbisio kadagiti OFW.
Babaen daytoy, panggep ti OWWA nga ipasigurado kadagiti OFW a saan nga agmaymaysa ken adda ahensia a makikadua kadakuada iti tunggal tukad ti panagdaliasat—manipud iti panagtrabahoda iti ballasiw-taaw agingga iti panagsublida inton agangay ken pannakabangon manen ti pagbiagda ditoy pagilian. (Bombo Alphea Pasquin)
