LA UNION – Naisayangkat idiay Bangbangolan National High School iti Araw ng Bata at Kabataan sa Barrio Fiesta 2026 kas paset iti panagrambak ti maika-28 a Cityhood Anniversary ti Ciudad ti San Fernando idi kalman, Marso 8.
Nakipaset dagiti agtutubo manipud kadagiti nadumaduma nga upland barangays ti ciudad kadagiti tradisional nga ay-ayam kas iti palo sebo, kadang-kadang group relay, pokpok palayok, tug of war, ken pibitin.
Indauluan daytoy ni City Councilor ken Event Chairperson Hon. Lilibeth Hipol, kadua dagiti nadumaduma a government offices, volunteers, karaman dagiti Punong Barangay ken Sangguniang Kabataan (SK) Chairpersons.
Malaksid kadagiti ay-ayam, adda dagiti nadumaduma a programa ti edukasion ken serbisio kadagiti agtutubo, kas iti workshop ti arts and crafts, first aid training, ken demonstrasion iti umno a panagbuggo ti ima, tapno mapalawa iti pannakaammoda maipapan iti salun-at, kinatalged, ken creativity.
Naitukon met iti libre a serbisio kas iti libreng gupit, ken tulong karaman iti panangiwaras ti bitamina, taraon, ken libro.
Panggep ti aktibidad a mapatibker iti camaraderie, panagtitinnulong, ken panangipateg iti kultura dagiti Pilipino. (Report by Bombo Alphea)
