BR LA UNION – Nalpasen ti kampanya ni Alex Eala iti women’s singles ti 2026 Asian Games kalpasan a naabak kenni Chinese player Wang Xiyu iti tallo a set, 6-3, 3-6, 6-2.
Napaspas a nakaala ti momentum ni Eala iti umuna a set ken immabot iti 5-0 ti lamang na.
Ngem nakasubbot ni Xiyu tapno aramiden a 5-3 iti iskor, ngem nagtalinaed latta a natibker iti Pinay ket naileppas na ti umuna a set, 6-3.
Iti maikadwa a set, nasapa a naiggaman ni Xiyu ti momentum ti ay-ayam kalpasan nga immabante iti 5-1.
Pinadas ni Eala a makasubbot ken immasideg iti 5-3, ngem napangabakan latta ti Chinese player iti set, 6-3.
Iti deciding set, naaddaan ti nasapa a lamang ni Xiyu, 4-1. Saan metten a nakasapol ti wagas ni Eala tapno maitabla ti laban ken nagtultuloy a nagbalin nga agresibo ti kalabanna.
Iti udi, lineppas ni Xiyu iti deciding set, 6-2, tapno magun-od ti panangabak.
Nupay saan a nakastrek iti finals, saan met nga agawid nga awan ti medalya na ni Eala agsipudta a nagun-od na ti bronze medal para iti Pilipinas iti women’s singles tennis.
