Kinumpirma ti Department of Justice (DOJ) nga adda ti iggem a video ti witness a ni alias ‘Totoy’ seknan dagiti impormasyon nga imbutaktak na mainaig kadagiti mapukpukaw a mammallot.
Segun mismo kenni Justice Secretary Jesus Crispin Remulla, natibker ti imet nga ebidensya ni alias ‘Totoy’ tapno mapaneknekan dagitoy nga inbinglay na kenkuana.
Saan laeng a basta testimonya ti inruar na nu di ket adda pay dagiti dadduma a dokumento a mausar tapno mangpatibker kadagiti impormasyon.
Innayon pay ti sekretaryo a saan nga imbento dagiti inbinglay ti witness agsipud ta addaan daitoy kadagiti videos a mangidepensa a dagiti imbutaktak na ket pudno a napasamak.
Maipalagip nga immunan nga inwaragawag na a dagiti mapukpoukaw a mammallot ket pinatay ken inbelleng da idiay Batangas, partikular sadiay Taal Lake.
Gapo iti napateg a partisipasyon na iti krimen ket adda iti posibilidad a maala isuna kas ‘state witness’.
Nupay kasta, manamnama met nga agbalin a narigat ti kaso agsipud ta naibinglay pay kenni Remulla a ti ‘mastermind’ ket addaan bileg nga impluwensyaan ti hudikatura wenno Korte Suprema.
