LA UNION – Agtultuloy iti panangipatungpal ti Local Government Unit (LGU) Balaoan, La Union ti Palit-Plastic Program wenno am-ammo kas “Aling Tindera Program (May Pera at Tuna sa Basura)” a nangrugi idi Abril 22, 2024, a mangtulong iti komunidad ken panangsalaknib iti aglawlaw.
Segun kenni Arlyn Prado, Barangay Secretary ti Paraoir, mabalin nga isukat dagiti naurnong a plastic bottles iti kuarta wenno de-lata. Nupay kasta, ad-adda a pilien ti barangay iti delata, gapu ta daytoy ket agpaay kadagiti kakadua ken residente iti barangay.
Nakadepende met iti timbang dagiti plastic bottles ti mabalin a maawat a kasukat. Kas pangarigan, iti 100 kilo a plastic bottles ket kasukat ti 100 piraso a de-lata a regular laeng ti kadakkelna wenno gramo.
Kabayatanna, tapno mapagtalinaed iti kinadalus ken kinapintas ti Immuki Island a maysa kadagiti mabigbig a pagturongan dagiti turista iti lugar, nangipatakder dagiti opisial ti Brgy. Paraoir ti Fish Pin wenno Materials Recovery Facility (MRF), a pagurnongan dagiti turista kadagiti plastic bottles a naggapu iti inumenda.
Babaen iti daytoy a gunglo, mas mapagtalinaed ti kinadalus ken kinaurnos ti Immuki Island a ma-enjoy dagiti sumarsaruno a bisita.
Kabayatanna, palagip met dagiti opisyal ti barangay kadagiti turista nga umay agpasyar iti Immuki Island nga ikuyogda koma ti basurada inton agawidda. Dagiti plastic bottles ket mabalin nga ibilleng iti Fish Pin, tapno makatulong iti programa ken iti panangsalaknib iti aglawlaw. (Report by Bombo Jordan)
