LA UNION – Insingasing ti City Inter Agency Task Force (IATF) ti San Fernando, La Union iti maysa nga alternative work scheme kadagiti amin a mangmangged ditoy syudad tapno maibaba ti exposure iti COVID-19.
Inaramid daytoy ti task force kalpasan a dimmanon itan iti 75 % dagiti positive cases ditoy syudad ti San Fernando, nangruna iti working sector ken Authorized Persons Outside Residence (APOR).
Mainaig ti daytoy, nangipaulog ni San Fernando City Mayor Dong Gualberto iti maysa nga EO#30-2021, a mangallokoy iti amin a pang-publiko ken pang-pribado nga opisina, agraman dagiti naduma-duma a business enterprises ditoy syudad, a mangipatungpal ti alternatibo a work arrangements kadagiti empleyado.
Kabilang iti mairek-rekomenda ket iti panangbuangay ti skeletal workforce, work from home, 4 day work-week ken dadduma pay nga altertibo tapno makissayan wenno maibaba ti exposure iti virus dagiti mangmangged, nangruna dagiti high probability workers.
Kabayatanna, idi kalman, Pebrero 25, nakailista manen ti syudad base iti datus ti Department of Health-Center for Health Development Region 1, iti walo a baro a kaso ti COVID-19.
Gaputi dayta, umaboten iti 592 iti confirmed cases ditoy syudad, 73 iti active cases a pakaibilangan iti 62 a pasyente nga agtaltalinaed iti isolation facilities bayat a 11 ti naka-admit iti ospital ditoy syudad.
