Maipasidongen ti special operations training dagiti amin a personnel ti Philippine Marine Corps (PMC) kas paset iti modernisasyon iti hanay, nangruna ita a sumangsango ti Pilipinas kadagiti nagduduma a pangta iti uneg ken ruar ti pagilian.
Segun iti PMC, saan laengen a dagiti elite units ti dumalan iti special training nu di ket amin a mangayat a makisalip iti kasundaluhan.
Maibasar iti baro a direktiba, main-inuten a mapastrek dagiti advanced training ti PMC kas kadagiti tactics and techniques a sigud ket para laeng kadagiti elite forces wenno dagiti miembro ti Force Reconnaissance Regiment.
Karaman kadagitoy ti small unit tactics, amphibious operations, covert reconnaissance, ken partisipasyon kadagiti interagency missions kakadwa kadagiti sabali pay nga elite forces ti militar.
Kinuna ni PMC Commandant Major General Vicente MAP Blanco III a pagaammo dagiti Marines iti kinaibtur da ken panagbalin a natibker kadagiti amin a klase ti karit ken ti aktibidad ket saan a mangkompromiso iti morale wenno personal skills da.
Daitoy a kabaroan a programa ket nairanta tapno masiguro nga amin a soldado ket nakasagana kadagiti amin nga aspeto ti gyera, manipud iti conventional warfare agingga kadagiti military mission nga agkasapulan ti agility ken precision, kasta met dagiti dadduma pay nga advanced skills tapno natalged a maleppas iti tunggal misyon.
Imbatad na a maawatan dagiti Marines a daitoy ket narigat nga addang ngem kasapulanen a maisayangkat tapno mapangato pay ti kabaelan ti tunggal soldado a kas maitunos iti tarigagay ti Armed Forces of the Philippines a maipasidong ti modernisasyon dagiti amin a hanay da.
