Nainget nga ipatpatungpal ti Bangar Municipal Police Station babaen ti panangidaulo ni Police Major Clinton P. Amawan iti Anti-Open Pipe Muffler Ordinance.
Panggep ti ordinansa a malapdan ti noise pollution ken mataginayon ti talna iti komunidad.
Segun kenni PMaj. Amawan, agarup 49 dagiti naglabsing nga indibidual ken namulta bayat a dagiti dadduma ket boluntario nga insuko dagiti open pipe muffler-da kas panangtungpal iti linteg.
Idi napalabas a bulan ti Enero, kanayunan a 14 dagiti naarestar iti kapada a panaglabsing.
Innayon pay ni PMaj Amawan a dakkel ti tulongna iti ordinansa kangrunaan iti rabii a kasapulan dagiti umili ti natalna nga aglawlaw kabayatan ti pannaturog-da.
Malaksid ti agtultuloy a pannakaipatungpal ti ordinansa, mangiyasangkat met ti Bangar MPS ti information and advocacy program tapno mailawlawag ken maallukoy dagiti motorista nga ikkaten ti open pipe muffler ken isubli ti sigud nga stock muffler.###
