Binabalaw ni Kontra Daya Convenor Danilo Arao iti naisingasing a House Bill 6771 wenno Anti-Political Dynasty Bill ni Speaker Bojie Dy ken Representative Sandro Marcos.
Iti panagsukimat ti grupo iti section 5 ti nasao a bill, nalimitaran dagiti agkabagian nga agkadua wenno agtugaw iti posision iti uneg ti maysa a distrito.
Kayatna a sawen nga mabalin a kontrolen ti maysa a puli dagiti adu a siudad wenno munisipalidad no maysa laeng a kabagian iti mangiggem iti posision iti tunggal lugar.
Segun kenni Arao, nalawag daytoy a panangallilaw ken maaramid a legal imbes a naan-anay a gibusan, ken arigna ket nagparang laeng kas maysa a “watered down” version gapu ta maipalubos iti dinastiya ngem iti sabali a porma.
Saan a maakseptar daytoy gapu ta iti kalikagum dagiti umili ket naan-anay a panangiparit kadagiti dinastia.
Innayon na pay a linabsing ti bill iti direktiba ti Konstitusion nga iparit dagiti dinastia ken napaay a mataming iti nairamut a panagkunniber.
Iti sabali a bangir, kenunana a nakapasidong ti survival mode iti Marcos administration gapo iti nagsinnungbangir nga eskandalo ken tignay-protesta para iti transparency, accountability, ken reporma.
Gapo iti daytoy ket mapilpilitan iti pamilya Marcos nga agkompromiso isu a naaramid a prayoridad iti Anti-Political Dynasty Bill.
Panawagan ti grupo kadagiti umili a lappedan iti nasao a singasing-linteg ken ikkan-atension dagiti dadduma pay a bill iti Kongreso.#
