LA UNION – Sumagmamano nga aldaw sakbay ti deadline iti substitution dagiti kandidato ket nangipilan iti kandidatura ti apo ni United Senior Citizen Partylist Rep. Mila Magsaysay a ni Milano Carlitos Magsaysay wenno ni Mitos tapno agkandidato a para konsehal iti ili ti San Juan, La Union.
Daytoy ket kalpasan a sinukatanna ti nagsunod a kandidato a ni Wenceslao Caluya ti Labor Party Philippines.
Ti 18-anyos a ni Mitos Magsaysay ket nagturpos idiay Lorma Special Science High School ken madama nga agbasbasa idiay De La Salle University.
Kabilang isuna kadagiti student leader ti naduma-duma nga organisasyon ken student ambassador pay ti nasao a nalatak nga unibersidad.
Maysa met isuna a businessman wenno negosyante a makinkukua ken mangimatmaton iti Luxury M a kaddua dagiti kakabsatna.
Tumultulong met isuna a mangipatpataray kadagiti dadduma a pay family business dagiti Magsaysay.
Ni Mitos ket putot ni sigud a San Juan Municipal Vice-mayor Miko Magsaysay, ken manungenna ni sigud a Municipal Councilor Migz Magsaysay.
Iti sabali a bangir, saan pay a maibaga dagiti sigud nga opisyal ti ili nga agama a Magsaysay no makibalubal manen dagitoy para iti masungad nga eleksyon inton 2022.
Maipalagip, inwaragawag iti Commission on Election (COMELEC) nga agpatingga laengen inton Nov. 15, 2021 ti panangipila iti substitution kadagiti agtartarigagay nga agkandidato.
