Maipanawagan kadagiti tricycle drivers iti maikadua a distrito ti La Union a dagus a makipaset iti agtultuloy nga aplikasion para iti Ayuda para sa Tricycle Operators and Drivers Association (TODA), a panggepna a tulongan dagitoy iti inaldaw a gastosda iti baet ti agtultuloy a panagngato ti presio dagiti produkto ti petroleo.
Maibasar iti pakaammo, silulukat itan ti proseso ti aplikasion para kadagiti kualipikado a benepisiario. Dagiti laeng registered members wenno active drivers ti TODA ti mabalin nga agaplikar para iti nasao a programa. Panggep ti nasao nga inisiatiba a kissayan ti epekto ti panagngato ti presio ti gasolina iti panagbiag dagiti traysikel drivers, a maysa kadagiti sektor a kaaduan a maapektaran iti nangato a gastos iti transportasion.
Tapno makaaplay, masapul a mapan dagiti aplikante iti bukodda nga opisina ti lokal a gobierno wenno Local Government Unit (LGU) para iti profiling ken validation. Karaman kadagiti kangrunaan a dokumento a maiyeg ket ti valid driver’s license kas pammaneknek iti kinalehitimoda kas maysa a driver.
Kalpasan ti verification, maikkan iti sertipikasion manipud iti LGU dagiti mabirukan a kualipikado, nga agserbi a pagbatayan ti panangawatda iti cash assistance iti babaen ti programa.
Inlawlawag pay dagiti otoridad a ti first wave ti pannakaiwaras ti tulong ket eksklusibo para kadagiti driver a kameng ti TODA. Mabalin a maikonsiderar dagiti dadduma a sektor.
Maipalagip kadagiti aplikante nga agingga laeng Abril 6, 2026 ti deadline ti panagipatulod ti aplikasion.Gapu iti daytoy, maparegta amin a kualipikado a tricycle drivers a dagus a mapan kadagiti opisinada iti LGU tapno masigurado a mabenipisyaran da iti maiwaras a tulong pinansial.
(Photo Courtesy: Congressman Dante Sotelo Garcia)
