Simmarungkar dagiti film producers, celebrities, actors ken creatives manipud Thailand idiay Manila tapno idatag dagiti potensial a film ken TV collaborations kadagiti production companies ditoy Pilipinas.
Indauluan ti Department of International Trade Promotion (DITP) Ministry of Commerce ti Thailand iti nasao nga event idiay Makati City, a tinabunuan dagiti nangibagi ti Thai entertainment industry ken dagiti opisial ti Pilipinas ken Thailand.
Karaman iti delegasion dagiti aktor a da Jatuporn “Jay” DangUrai ken Yang Dong Won, kasta met dagiti producer ken executive manipud iti nadumaduma a Thai production companies.
Sakbay ti presentasion, simmarungkar ti delegasion ti Thailand idiay Quezon City para iti saritaan maipapan iti entertainment partnerships kas paset ti “Thai Content in the Philippines” trade mission.
Segun iti maysa a media network, nakapaitangatang daytoy iti dandani 100 a Thai lakorns wenno drama manipud idi 2018, nga agserserbi a pundasion para iti pannakapalawa ti entertainment collaborations iti nagbaetan ti dua a pagilian.###
