LA UNION-Marugyanen ti assessment iti epekto ti Bagyong Odette iti Ilocos Region nangruna iti sektor ti agrikultura.
Daytoy ket segun iti Office of the Civil Defense Region 1.
Iti pannakaiuman ti Bombo Radyo La Union kenni Mark Masudog, Information Officer ti nasao nga ahensya kinuna a nakaawat da ti inisyal a report maipangep kadagiti nadadael a pagay.
Ur-urayen ti opisinada dagiti pinala report manipud kadagiti Provincial Disaster Risk Reduction Management Council(PDRRMCs) ti rehiyon.
Naminsan manen a nagpalagip ti Office of the Civil Defense Region kadagiti mangngalap a saan pay a tumapog iti kabaybayan no man addan iti ruar ti Philippine Area of Responsibility ti bagyo Odette.
Segun kenni Masudog, manamnama ti napipigsa a dalluyon gaputa makapaspasar pay laeng tin napipigsa nga angin ti dadduma a paset ti Ilocos region.
