BR LA UNION – Impaganetget ni Supreme Court Senior Associate Justice Marvic Leonen a rumbeng nga ag-convene ti Senado kas impeachment court para iti kaso ni Vice President Sara Duterte, maibasar iti sarita a “forthwith” a nakailanad iti Konstitusyon.
Iti concurring opinion na iti desisyon ti Korte Suprema, impaganetget ni Leonen a ti impeachment court mismo, a saan laeng a Senate President, ti rumbeng a mangidaulo iti panang-organisa ti panagusig.
Iti waragawag ket adda pakainaiganna iti petisyon ni Catalino Generillo Jr. a kumidkiddaw a piliten ti Senado a dagus nga agtignay.
Nupay kasta, iti botos a 14-0-1, imbasura ti Korte Suprema ti nasao a petisyon ken maibilang itan a moot.
Iti desisyon nga insurat ni Associate Justice Rodil Zalameda, agtignay ti Senado a “forthwith” wenno iti ‘umno a panawen’ ken awan ti itudtuding nga eksakto a deadline ti Konstitusyon nu kaatnu ti rumbeng a panangirugi ti impeachment trial, ken panangisayangkat ti “forthwith,” ket diskresyon ti Senado.
Dinakamat pay ti Korte a saan a maitunos ti petisyon para iti mandamus, a maus-usar tapno ipatungpal iti nalawag a legal a pagrebbengan. Imbes ket maibilang daytoy kas certiorari.
Impaganetget ti Korte a kas co-equal constitutional body, saan a mabalin a pakibiangan ti hudikatura dagiti garaw ti Senado malaksid laeng nu adda iti grave abuse of discretion.
Kabayatanna, saan a nakipaset iti binnotosan ni Associate Justice Alfredo Benjamin Caguioa.
Innayon pay ti Korte a nagbalinen a moot iti petisyon agsipudta immunan a nawaswas ti Articles of Impeachment kontra kenni Duterte idi napalabas a tawen.
