Pinasingkedan ni Department of Justice (DOJ) Secretary Jesus Crispin Remulla nga addan iti naipaulog nga Immigration Lookout Bulletin Order (ILBO) kontra kadagiti indibidwal a karaman ti kaso dagiti missing sabungeros pakairamanan ti negosyante a ni Atong Ang ken ti aktres a ni Gretchen Barretto kasta met ti sigud a PNP National Capital Regional Police Office Director a ni Jommel Estomo.
Segun kenni Remulla, amin a dinakamat ti whistleblower a ni Julie ‘Dondon’ Patidongan ket karaman iti ILBO. Dagitoy ket addan amin iti partisipasyon da kadagiti napukpukaw a mammallot manipud tawen 2021 agingga 2022.
Inaklon pay ni Remulla nga adda pay dagiti dadduma nga akusado a nakaruaren ti pagilian ken itan ket tarigagay da a kamaten ken maisubli ditoy Pilipinas.
Agtultuloy met ti panagrang-ay ti kaso ken idi laeng kallabes ket nakarekobre dagiti otroridad ti aganay 401 a paset ti rurog ti tao idiay Taal Lake a segun kenni Patidongan ket lugar a nangibellengan kadagiti biktima. Gaksang-gasat ket nagsasakit payen dagiti dadduma a divers a mangisaysayangkat iti search and retrieval operations.
