Inlawlawag ni Atty. Israelito Torreon a saanda a natangdanan wenno intuding ti asinoman a politiko a mangibagi iti pamilia ti pimmusay nga Ateneo basketball player a ni Rene Baterbonia.
Daytoy ket kalpasan nga inlibak ni Agusan del Sur Governor Santiago Cane Jr. nga isu iti nangala kada Torreon ken Atty. Jimmy Bondoc kas abogado ti pamilia.
Segun ti Torreon Law Firm, inasitgan ida ti maysa a kabagian ken gagayyem ti pamilya tapno agkiddaw ti tulong, idinto nga indanon laeng ti gobernador nga adda ti abogado a nakasagana a tumulong.
Iti agdama, adda dagiti kameng ti legal team a mangsupsuporta iti pamilia ken mangisayangkat iti panagkalap ti ebidensia, panangrepaso iti dokumento, ken pannakikoordinar kadagiti autoridad.
Inpaganetget da Torreon a ti panggepda ket ti pananggun-od kadagiti sungbat, panagsungbatan, ken hustisia para kada Rene Baterbonia ken Divine Adili.###
