Saan a kinumpirma wenno inlibak ni Attorney Martin Delgra idi nadamag isuna idiay The Hague, Netherlands nu maysa isuna kadagiti dua a Pilipino a tumulong iti defense team ni sigud a Presidente Rodrigo Roa Duterte.
Nadamag pay iti abogado nu anya ti panggep na a nagturong iti nasao a pagilian ken insungbat na met a paset laeng daitoy iti panagsuporta na iti sigud a Presidente ti Pilipinas.
Sakbay daitoy ket pinasingkedan ti lead counsel ti defense team ni Duterte a ni Nicholas Kaufman nga adda metlaeng ti Pilipino a miembro ti bunggoy a mangdepensa iti sigud a Presidente iti sangsangwen na a kaso sadiay International Criminal Court (ICC). Iti nasao nga legal team ket buklen dagiti lima a miembro.
Impaganetget met ni Bise Presidente Sara Duterte a kasapulan ti Pilipino nga abogado iti defense team tapno isu ti mangidaulo ti panangilawlawag kadagiti paglintegan ti Pilipinas idiay ICC.
Kabayatanna, immuna metten a kinuna ti Bise Presidente a saan nga agbalin a paset ti defense team ni Attorney Harry Roque agsipud ta ipamaysa pay ti sigud a presidential spokesperson ti asylum application na idiay The Netherlands.
Iti agdama, ni Kaufman ti ngserserbi kas lead counsel ti sigud Presidente bayat nga associate counsel met ti international criminal law expert a ni Dov Jacobs nga immuna met a nanaganan ita nga lawas.
