Dimmepensa ni Australian Prime Minister Anthony Albanese kontra iti panangkondena ni U.S. President Donald Trump iti maipagarup a kinakurang ti suportada iti mapaspasamak a tensyon idiay Middle East.
Daytoy ket kalpasan nga impeksa ni Trump ti pannakadismayana iti nagbalin a sungbat ti Canberra iti saritaan ti US-Israel kontra ti Iran. Segun kenni Albanese, awan ti kiddaw ti Estados Unidos a saan a sinurot ti Australia.
Immunan a nangipatulod iti pagilian ti Royal Australian Air Force E-7A Wedgetail surveillance plane tapno tumulong idiay United Arab Emirates kontra iti pangta ti missile strikes manipud ti Iran. Nupay kasta, nagkedkedda a makipaset iti operasion tapno bantayan iti Strait of Hormuz, gaputa awan ti direkta a kiddaw manipud iti Estados Unidos.
Malaksid ditoy ket nagperma met iti Australia iti maysa a katulagan kadua dagiti 22 a pagilian tapno adalen iti posible a misyon iti seguridad dagiti shipping routes bayat a ngumatngato iti presyo ti langis.
Impaganetget ni Albanese nga agtaltatinaed a naurnos iti relasionna kenni Trump, ngem impaganetget a saan met a nakonsulta iti Australia sakbay a nangisayangkat ti addang ti Estados Unidos ken Israel kontra ti Iran.
Segun kenkuana, ti kangrunaan a responsibilidad ti Australia ket ti bukodda a desisyon ken sungbat iti sitwasyon.###
